Unibet-ը «Հոլանդիայի նվաճումը» մարտավարության շրջանակներում դարձել է տեղի հեծանվաթիմի հովանավորը

Unibet-ը միացավ հոլանդական լիցենզիայի համար պայքարին

Հոլանդական լրատվամիջոցների տեղեկություններով՝ կողմերի միջեւ կնքված քառամյա պայմանագիրը գնահատվում է $7.5 մլն: Բայց Unibet-ի լոգոն կարող է մրցավազքային թիմի հեծանիվների վրա հայտնվել միայն 2017 թվականին, հենց այդ պահից էլ պաշտոնապես ուժի մեջ կմտնի գործարքը: Խնդիրը նրանում է, որ Unibet-ը ներկայումս տքնաջան աշխատում է, որպեսզի ստանա հոլանդական պաշտոնական լիցենզիա եւ սկսի աշխատել երկրի օրենսդրական դաշտում:

Մալթայի լիցենզիայով գործող բուքմեյքերի հետ համագործակցող թիմը պատկանում է Նիդեռլանդների հեծանվասպորտի ազգային ասոցիացիային (KNWU): Նախորդ 20 տարիներին բուքմեյքերի «պաշտոնը» զբաղեցրել է Rabobank-ը. հենց այդ անունով է թիմը հայտնի դարձել եվրոպական մայրուղային հեծանվասպորտում: Բայց վերջերս բանկիրները հրաժարվել էին հովանավորել մարզիկներին՝ պատճառաբանելով վերջին տարիներին հեծանվասպորտում մեծ քանակությամբ դոպինգային սկանդալները:

KNWU-ի նախագահ Մարսել Վինտելսը չի թաքցրել գործարքից գոհունակությունը. «Unibet-ի հետ համագործակցությունը կարեւոր կենսական նշանակություն ունի մեր երկրում պրոֆեսիոնալ հեծանվասպորտի զարգացման համար»:

Ինչպես հայտնի է, Հոլանդիայի կառավարությունը De Lotto ընկերությամբ երկրում ունի ազարտային խաղեր կազմակերպելու մենաշնորհ: Մինչ այժմ օտարերկրյա գեմբլինգ-օպերատորների գործունեությունն օրենսդրորեն արգելված է: Բայց հայտնի է դարձել, որ քաղաքական շրջանակներում արտասահմանյան օպերատորներին լինցենզավորելու համար լոբբիստական աշխատանք է ընթանում:

Հետաքրքիր է, որ De Lotto-ն KNWU-ի (կազմակերպության, բայց ոչ թիմի) հովանավորն է: Իր պաշտոնական հայտարարությունում ընկերությունն արդեն հայտնել է, որ «խիստ հիասթափված է» արտասահմանյան բուքմեյքերի հետ պայմանագիր կնքելու վերաբերյալ ասոցիացիայի որոշումից: