Բուքմեյքերներն ավելի բարձր են գնահատել այլմոլորակայինների հայտնաբերման շանսերը ՉԹՕ-ների մասին նյութերի վերաբերյալ Քլինթոնի ակնարկից հետո

Հիլարի Քլինթոնը պատրաստվում է պատմել այլմոլորակայինների լինել-չլինելու մասին

Վերջերս Հիլարի Քլինթոնի խորհրդական Ջոն Պոդեստան հայտարարեց, որ նախագահ ընտրվելու դեպքում դեմոկրատների թեկնածուն մտադիր է լույս սփռել այլմոլորակայինների վերաբերյալ գաղտնի նյութերի վրա: Դրանից հետո William Hill բուքմեյքերական ընկերությունում կտրուկ փոխվել է այլմոլորակայինների գոյության մասին հրապարակայնորեն հայտարարելու համար սահմանված գործակիցը՝ 1001.0-ից դառնալով 101.0:

Իրականությունը փնտրողներն արդեն ասել են, որ 2016 թվականին մարդկությունը կարող է իմանալ աշխարհի պատմության ամենամեծ եւ մարդկանց երեւակայությունը բորբոքող հանելուկներից մեկի պատասխանը: Անձամբ Քլինթոնը նախորդ տարվա վերջում հայտարարել է, որ պատրաստվում է այլմոլորակայինների մասին իմանալ հնարավոր ամեն ինչ:

«Ես կարծում եմ՝ մեզ, հնարավոր է, արդեն այցելել են: Մենք հավանաբար չգիտենք»,- տիկին Քլինթոնի խոսքերը մեջբերում է Daily Star-ը:

«Դա զարմանալի է հնչում, բայց գործակիցների անկումը նշանակում է, որ մենք երբեւէ այնքան մոտ չենք եղել մեր՝ այս աշխարհում միակը լինել-չլինելը պարզելուն»,- ընդգծել է William Hill-ի ներկայացուցիչ Ռուպերտ Ադամսը եւ ավելացրել, որ բուքմեյքերը կարող է խոշոր վճարումների բախվել»:

Paddy Power բուքմեյքերական ընկերությունում 2016 թվականին այլմոլորակայինների գոյության ապացուցման վրա կարելի է խաղադրույք կատարել 26.0 գործակցով: Այնուամենայնիվ, 2017, 2018 եւ 2019 թվականների համար այդ գործակիցը մոտ 4 անգամ մեծ է՝ 101.0:

Ներկայումս շարունակվում են որոշվել Դեմոկրատական եւ Հանրապետական կուսակցությունների թեկնածուները: Հիլարի Քլինթոնը ԱՄՆ-ի նախագահական ընտրություններում դեմոկրատների ներկայացուցիչը դառնալու պայքարի ֆավորիտն է: Նրան աջակցում է արդեն 1692 պատգամավոր, իսկ թեկնածության ապահովագրման համար պետք է 2383 ձայն: Հանրապետականներից ֆավորիտը 640 ձայնով Դոնալդ Թրամփն է (անհրաժեշտ է 1237-ը):

William Hill բուքմեյքերը դադարել է խաղադրույքներ ընդունել այդ իրադարձության վրա: Ավելի վաղ ընտրություններում Հիլարի Քլինթոնի հաղթանակի գործակիցը 1.5 էր: