«Յուվենտուս» – «Ռոմա». Էդուարդ Մորի կանխատեսումը

«Յուվենտուսը» գտնվում է իր համար անսովոր դիրքում՝ մրցաշարային աղյուսակի միջնամասում: Թիմը վատագույն մեկնարկը գրանցեց իր պատմության մեջ: Սակայն թուրինցիներն աստիճանաբար ընթացք են հավաքում և ունեն ուժեղ ֆուտբոլիստներ: Մասիմիլիանո Ալեգրիից քիչ ժամանակ պահանջվեց թիմը վերափոխելու համար: Եվ հիմա «Յուվենտուսը» սկսել է հաղթել:

«Ռոման» գլխավորում է Մոուրինյոն, մեզ համար միշտ հետաքրքիր է հետևել Ժոզեի թիմերին: Լավ մարզավիճակում է Հենրիխ Մխիթարյանը՝ չնայած շատերը մտածում էին, որ նա թիմից կհեռանա մարզիչի պատճառով, սակայն նրանք ընդհանուր լեզու գտան: Առջևի գծում լավ տեսք ունի նաև Տեմի Աբրահամը: Ընդհանուր առմամբ, թիմը վատ ֆուտբոլ չի ցուցադրում:

Այստեղ մեծ դերակատարում ունի ազգային հավաքականների խաղերի օրացույցը: Հարավամերիկյան հավաքականներում խաղացողներ ունեցող ակումբները կունենան խնդիրներ: Սակայն «Յուվենտուսի» հիմնական կազմում շատ են իտալացիներն ու եվրոպացիները: Քանի որ Իտալիայի հավաքականը մյուսներից շուտ խաղաց Ազգերի լիգայում, նրանք ավելի շատ ժամանակ ունեցան հանգստանալու համար: Իտալացիների տոնուսն ավելի բարձր է:

Կարծում եմ՝ «Յուվեն» կշարունակի թափ հավաքել առաջնությունում: Թիմից սպասում եմ հաղթանակների շարք: «Ռոման» այստեղ ոչ մի կերպ չի կարողանա խանգարել թուրինցիներին:

Իմ կանխատեսումն է՝ «Յուվենտուսի» հաղթանակ: