«Ռեալ Մադրիդ» — «Աթլետիկո Մադրիդ». Ռոբերտ Գասպարյանի կանխատեսումը
Բնականաբար, Չեմպիոնների լիգայի եզրափակչում պատահական թիմեր չեն հայտնվում: Ուստի առանձնացնել թիմերից մեկին` սխալ կլինի: Իհարկե` առաջին հայացքից Մադրիդի «Ռեալը» բոլոր առումներով գերազանցում է իր մրցակցին:
Ինչի՞ հաշվին կարող է հաղթել «Ռեալը».
1. Կազմի ընտրություն — «Սերուցքայինների» հիմնական կազմի ֆուտբոլիստներից յուարքանչյուրն իր անունով, աշխատավարձով ու նվաճումներով անհամեմատ ավելի բարձր է գտնվում Դիեգո Սիմեոնեի գլխավորած թիմի տղաներից: Այո՛, «աթլետների» կազմում ևս շատ են բարձրակարգ ֆուտբոլիստները, սակայն բոլոր ամպլուաներում «Ռեալի» տղաներն ավելի ուժեղ են: Բացի դրանից, պահեստայինների նստարանի երկարության տեսանկյունից «Ռեալը» ևս շահեկան դիրքում է: Այնտեղ նստած են 50-60 միլիոնանոց տղաներ, և ցանկացած պահին Զիդանը կարող է ապավինել նրանց օգնությանը:
2. Եզրափակիչներում և կարևոր խաղերում հանդես գալու փորձ — Թեպետ վերջին տարիներին «Աթլետիկոն» զգալիորեն բարելավել է իր խաղն ու արդեն երկար ժամանակ է գտնվում է եվրոպական ֆուտբոլի բարձունքում, այնուամենայնիվ, մեծ խաղերում հանդես գալու փորձն առայժմ շատ չէ: «Ռեալի» տղաները ոչ միայն մեծանուն են, այլև իրենց ազգային հավաքականներում համարվում են առաջատար, անհատականություն: «Աթլետիկոյում» անհատականությունը խաղադաշտում չէ:
3. Քրիստիանո Ռոնալդու — Ցանկացած կամ գրեթե ցանկացած խաղում «Ռեալը» համարվում է ֆավորիտ, քանի որ թիմում է հանդես գալիս ՔրիՌոն: Պորտուգալացին այս մրցաշրջանը ևս հիանալի է անցկացնում և թիմին տանում իր հետևից: 2 տարի առաջ Լիսաբոնում նա գլխավոր գործող անձանցից չէր: Նրա աստղը խամրել էր Բեյլի ու հատկապես Դի Մարիայի փայլի ֆոնին: Հիմա պորտուգալացին ավելի մոտիվացված է և նպատակ ունի ոչ միայն ամրապնդել իր ռմբարկուական առաջատարությունը, այլ նաև նվաճել 3-րդ անհատական ՉԼ-ի գավաթը:
Ինչի՞ հաշվին կարող է հաղթել «Աթլետիկոն».
1. Թիմային խաղ — Շատ-շատերի կարծիքով «Աթլետիկոն» արժանի չէր եզրափակիչ դուրս գալուն: ՊՍՎ-ին թիմն անցավ մեծ դժվարությամբ, «Բարսելոնան» շրջանցվեց մեծ մասամբ մրցավարության շնորհիվ, իսկ կիսաեզրափակչում «Բավարիան» թերագնահատեց մրցակցին: Սակայն եթե այս ամենին նայենք այլ աչքերով, կհասկանանք, որ «Աթլետիկոյից» «ընտանեկան» ֆուտբոլ խաղացող թիմ գոյություն չունի: Թիմ, որը չունի վառ արտահայտված առաջատար կամ գերաստղ: Թիմ, որը երբեք հույսը չի դնում մրցավարության կամ մրցակցի սխալի վրա:
2. Հակագրոհներ — Մադրիդյան այս ակումբի գլխավոր զենքերից մեկը պաշտպանությունից արագ դուրս գալն է: Կազմում ընդգրկված ֆուտբոլիստների մեծամասնությունն ունիվերսալ է: Հակագրոհներն այստեղ չեն անցկացնում միևննույն ֆուտբոլիստները: 3 րոպեի տարբերությամբ 3 տարբեր ֆուտբոլիստներ կարող են Ուսեին Բոլտից ոչ պակաս արագ նետվել հակագրոհի: Եթե պաշտպանական գիծը հանդես գա անթերի, անգամ Մեսսին, Ռոնալդուն և նրանց կլոնները չեն կարողանա գոլով աչքի ընկնել:
3. Դիեգո Սիմեոնե — «Էլ Չոլոն», անկասկած, այսօրվա ամենակոլորիտային մարզիչն է և «աթլետների» վերջին հաջողությունների գլխավոր գրավականը: Գրեթե միշտ իմպուլսիվ, ակտիվ ու խաղի մեջ ընկղմված Սիմեոնեն ոչ մի վայրկյան չի դադարում օգնել, հուշել ու առաջնորդել իր տղաներին: Մարզչական աթոռին նստած անհատականանությամբ «աթլետներն» անհամեմատ գերազանցում են «սերուցքայիններին»: Զիդանի գործոնը լինելու է այս դիմակայության ամենագլխավոր հարցականը: Դրա շնորհիվ «Ռեալը» կամ կհաղթի, կամ կպարտվի:
Ակնկալում եմ ոչ այնքան գոլառատ հանդիպում` հաշվի առնելով թիմերի տակտիկական նախասիրությունները: Բայց ես ֆավորիտ եմ համարում «Աթլետիկոյին»:
Իմ կարծիքով՝ «Աթլետիկոն» այս խաղում առնվազն 2 գնդակ կխփի, այն էլ՝ հիմնական ժամանակում:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: