Այ սա խաղադրույք է! Խաղացողը $250 հազարի ջեքփոթ է շահել՝ գուշակելով 15 խաղի արդյունք

Սպարտակ Պետրոսյան

Ուելսյան «Սուոնսի» ակումբի երկրպագուն 174 հազար ֆունտ ստեռլինգ է հաղթել (մոտ $250 հազ.)՝ Coral բուքմեյքերական ընկերությունում խաղադրույք կատարելով մեկ ֆունտ: Խաղացողը գուշակել է 15 ֆուտբոլային հանդիպման արդյունք՝ անչափ երախտապարտ մնալով «Չելսիի» կիսապաշտպան Էդեն Ազարին, ում գոլը «Տոտենհեմի» հետ խաղում հավասարեցրեց հաշիվը:

Ազարն օգնել է ոչ միայն «Լեսթերին», այլ նաեւ «Սուոնսիի» երկրպագուին

Coral-ի կազմակերպած ջեքփոթի խաղարկության համաձայն՝ պարտադիր էր ճիշտ գուշակել ԱՊԼ-ի եւ Անգլիայի այլ ֆուտբոլային լիգաների 15 խաղերի արդյունքները: Մասնակցության վճարն ընդամենը մեկ ֆունտ էր: Պետք է նշել, որ «Սուոնսիի» 35-ամյա ֆանը մասնագիտությամբ նկարիչ է, եւ ավելի վաղ, իր խոստովանմամբ, հաճախ է մասնակցել նման խաղարկությունների: Բայց այսքան լայն բախտը նրան երբեւէ չէր ժպտացել, հաղորդում է WalesOnline-ը:

«Ես դեռեւս չեմ կարողանում հավատալ: Վերջին խաղից առաջ («Չելսի» — «Տոտենհեմ») ես գիտեի, որ ինձ ոչ-ոքի է անհրաժեշտ: Այն պահին, երբ հյուրերը 2:0 հաշվով հաղթում էին, ես մտածեցի, որ սա վերջն է: Բայց «Չելսին» հավասարեցրեց հաշիվը, եւ վերջին յոթ րոպեները կյանքումս ամենաերկարն էին»,- տպավորություններով կիսվել է հաջողակը:

Մոտ $250 հազարի տիրակալը կարողացել էր գուշակել «Սթոք Սիթի» — «Սանդերլենդ», «ՄՅու» — «Լեսթեր», «Չելսի» — «Տոտենհեմ» խաղերում արձանագրված ոչ-ոքիները: