Ֆուտբոլային մեկնաբան, Vivaronews.am կայքի լրագրող, հաղորդավար Ռոբերտ Գասպարյանը կանխատեսում է արել Հայաստան — Բելառուս ընկերական հանդիպման վերաբերյալ։ Մեր փորձագետը խաղադրույք է կատարում Հայաստանի հավաքականի հաղթանակի վրա։
Հայաստանի ազգային հավաքականը, որն արդեն ավարտել է ելույթները Աշխարհի 2018 թվականի առաջնության ընտրական մրցաշարում, կանցկացնի 2 ընկերական հանդիպում։ Դրանցից առաջինը տեղի կունենա այսօր՝ Վազգեն Սարգսյանի անվան մարզադաշտում։ Բելառուսի ազգային հավաքականի հետ այսօր կայանալիք հանդիպումը լավ հնարավորություն է երկրպագուների մոտ սասանված հեղինակությունը վերականգնելու համար։ Չնայած նրան, որ Հայաստանի հավաքականը խաղին մոտեցել է մի շարք կադրային խնդիրներով, այնուամենայնիվ Արթուր Պետրոսյանի գլխավորությամբ տղաները կփորձեն հաղթանակ տանել այս ոչ պաշտոնական խաղում։ Վնասվածքի պատճառով հավաքականին չեն միացել Էդգար Մալաքյանը, Սարգիս Ադամյանը, իսկ Տարոն Ոսկանյանի բացակայության պատճառը դեռ հայտնի չէ։ Չնայած մի շարք կադրային խնդիրների՝ կանխատեսվում է, որ Հայաստանի հավաքականը կցուցադրի գրագետ ֆուտբոլ և կկարողանա վերջապես հաղթանակ տոնել։ Դրա համար սահմանված է 2․28 գործակիցը։