Նոր Զելանդիայի Կրայսթչերչ քաղաքի փոքրիկ բնակիչը դարձել է ազգային վիճակախաղի ամենաերիտասարդ հաղթողը՝ շահելով մեկ միլիոն նորզելանդական դոլար:
Երեխայի ծնվելուց անմիջապես հետո ծնողները նրա համար գնել են Bonus Bonds ընկերության բաժնետոմսեր՝ 250 նորզելանդական դոլարի չափով: Այդ բաժնետոմսերի յուրաքանչյուր սեփականատեր հնարավորություն է ստանում մասնակցել ամեն ամիս անցկացվող վիճակախաղին, հաղորդում է The Daily Mail-ը:
Սեպտեմբերին բախտը ժպտացել է հենց այս երեխային: Նրա ծնողները շատ ուրախ են: Փոքրիկի հայրն անգամ չի կարողացել զսպել հուզմունքը, երբ իմացել է շահումի մասին: «Ամուսինս պարզապես թռչկոտում էր հեռախոսով խոսելիս»,-պատմել է նրա կինը:
Հետաքրքիր է, որ խոշոր շահումի մասին ծնողներն իմացել են արձակուրդից վերադառնալուց հետո: Նրանց խոսքերով, միշտ երեխային յուրահատուկ են համարել, քանի որ նա ծնվել է Սուրբ Ծննդյան օրը: Հիմա փոքրիկի ապագայի մասին կարելի է չանհանգստանալ, քանի որ նա արդեն բավական մեծ կապիտալ ունի: