Սպորտային խաղադրույքներ. «Մանչեսթեր Սիթի» — «Էվերթոն». խաղի հիմնական իրադարձությունները կընթանան երկրորդ կեսում

«Մանչեսթեր Սիթիի» հաղթարշավն առաջնությունում ընդհատվեց նախորդ տուրում, երբ թիմը մրցակցի հարկի տակ 0:2 հաշվով զիջեց «Տոտենհեմին»: Հավաքականների հանդիպումներից հետո «Սիթիի» ֆուտբոլիստները կձգտեն մի նոր հաղթական հանդիպումների շարք անցկացնել:

Գալիք խաղում «քաղաքաբնակների» մրցակիցը լինելու է «Էվերթոնը»: Ռոնալդ Կումանի գլխավորությամբ մերսիսայդցիները բավականին լավ խաղ են ցուցադրում և 14 միավորով զբաղեցնում է 5-րդ հորիզոնականը: Ասել է թե ոչ այդքան հեշտ հանդիպում է սպասվում «Սիթիին», չնայած այն հանգամանքին, որ խաղը կայանալու է «Էյթիհադում»:

«Տոտենհեմից» հետո «Էվերթոնն» Անգլիայում լավագույն պաշտպանությունն ունի (5 բաց թողած գնդակ): Ռոնալդ Կումանի թիմի պաշտպանությունը ճեղքելու գործն ավելի է բարդանում, երբ տեսնում ենք, որ բացի Կեվին Դե Բրույնեից, հանդիպումը վնասվածքի պատճառով կարող է բաց թողնել նաև Ռահիմ Սթերլինգը, ով Գվարդիոլայի ղեկավարությամբ հիասքանչ ֆուտբոլ է սկսել ցուցադրել:

Այնուամենայնիվ, կարծում եմ, որ «Սիթին» կարգի հաշվին հաղթանակ կտանի: Թիմում շատ են վարպետները, դե իսկ Սերխիո Ագուերոն լավ մարզավիճակում է և արդեն հիմա պայքարում է լավագույն ռմբարկուի կոչման համար (ներկա պահին խփել է 5 գոլ և մեկ գոլով զիջում է միայն Դիեգո Կոստային):

Հաշվի առնելով վերոնշյալ գործոնները՝ կառաջարկեմ հետյալ երկու խաղադրույքները. առաջին՝ 1,81 գործակցով «Մանչեսթեր Սիթիի» հաղթանակը երկրորդ խաղակեսում և երկրորդ՝ 1,96 գործակցով «երկրորդ խաղակեսն առաջինից արդյունավետ կլինի»: