«Սևիլիա» — «Բարսելոնա». Ռոբերտ Գասպարյանի կանխատեսումը

Իսպանական ֆուտբոլային մրցաշրջանի ոչ պաշտոնական մեկնարկը տրվեց ՈՒԵՖԱ-ի Սուպերգավաթի խաղարկությամբ, որտեղ իրար հետ մրցում էին Պրիմերայի երկու ներկայացուցիչներ: Սակայն պաշտոնապես մրցաշրջանը կբացվի երկրի սուպերգավաթի խաղարկությամբ: Մասնակիցներից մեկը դարձյալ «Սևիլիան» է, իսկ մրցակիցը Էլ Կլասսիկոյի մասնակիցներից մյուսը` «Բարսելոնան»:

Անդալուսական ակումբը կազմավորվում է 0-ից: Հեռացան մի շարք առաջատարներ, իսկ նոր գլխավոր մարզչի առաջ դրվել է խնդիր` պահպանելու թիմում հաղթողի հոգեբանությունը: «Ռեալի» հետ Եվրոպայի Սուպերգավաթի խաղում «Սևիլիան» գերազանց տպավորություն թողեց: Երևացին մարզչի կրեատիվ նոր մտքերը: Չիլիի ընտրանու նախկին մարզիչն այստեղ էլ է կիրառում 3 պաշտպանով տակտիկան: Նորեկները վատ չխաղացին, ապացուցեցին, որ կարող են խաղալ տարբեր դասավորություններով, միայն պետք է աշխատել ֆիզիկականի վրա:

Կատալոնական չեմպիոնը դեռ նախապատրաստվում է: Ընկերական մրցաշարում թիմի ցուցադրած ֆուտբոլը մեղմ ասած չտպավորեց: «Լիվերպուլից» կրած 0:4 հաշվով պարտությունը շատ հարցականներ է թողնում: Պարզ է, որ Մեսսին ու Սուարեսը դեռ մարզավիճակ չեն հավաքել, Նեյմարն առհասարակ բացակայում էր, ֆուտբոլիստները դեռևս ամառային արձակուրդների տպավորության տակ են: «Սամպդորիայի» հետ խաղում երևացին «Բարսելոնայում» առկա խնդիրների բոլոր կողմերը, մասնավորապես պաշտպանությունում: Թեպետ Վերմալենը չէր համարվում հիմնական կազմի ֆուտբոլիստ, սակայն նրա` «Ռոմա» հեռանալը կարող է լուրջ անդրադառնալ հետին գծի խաղի վրա:

Բայց որքան էլ որ «Բարսելոնան» խնդիրների մեջ շաղախված լինի, որքան էլ բացակայեն առաջատարները, թիմն իր գնդակները խփում է: Այնպես որ, այսօրվա խաղը ևս բացառություն չէ: «Բարսելոնան» խաղում առնվազն երկու գնդակ կուղարկի մրցակցի դարպասը: