«Ռեալ Մադրիդ» — «Աթլետիկո Մադրիդ». Աբրահամ Խաշմանյանի կանխատեսումը
Մեզ մոտ մի փոքր չարաշահում են «պաշտպանողական», «հարձակվողական» արտահայտություններով թիմի ցուցադրած ֆուտբոլը որակելը: Երբ վերլուծում ես, հասկանում ես, որ այդ թիմը հարձակվողական ֆուտբոլ չի խաղում և չի էլ կարող խաղալ, քանի որ դրա համար առաջին հերթին բարձրակարգ խաղացողներ են անհրաժեշտ, որն ունեն «Բավարիան», «Բարսելոնան», «Ռեալը», «Մանչեսթեր Սիթին»: Շատ գործոններ կան: Ճկուն, բանիմաց մարզիչը, եթե իր ձեռքի տակ ունեցածով քաղում է առավելագույնը, ուրեմն մեծագույն մասնագետ է: Իսկ ի՞նչ ֆուտբոլ պետք է խաղար «Աթլետիկոն» Սիմեոնեի գլխավորությամբ՝ ունենալով ընդամենը մեկ Գրիզման:
«Աթլետիկո Մադրիդը» հիանալի թիմ է, ունի մեծագույն մարզիչ: Չեմ կարծում, որ առաջիկա խաղում Սիմեոնեի թիմը կխաղա հարձակվողական ֆուտբոլ: Եթե «Աթլետիկոն» կարողացել է հաղթել «Բավարիայի» և «Բարսելոնայի» պես գերհզոր ակումբների, ապա կարող է գերազանցել ցանկացած հակառակորդի: Բնականաբար, դժվար է հակախաղ գտնել նման հագեցված պաշտպանության դեմ: Բայց «Ռեալում» կան մեծագույն աստղեր, ովքեր անհատական գործողություններով կարող են վճռել հանդիպման ելքը:
Ինչ վերաբերում է Զիդանի գլխավորությամբ «Ռեալի» արդյունքներին, ապա չէի ասի, որ ֆրանսիացու աշխատանքն էր, այլ «Բարսելոնան» սայթաքեց, ինչի շնորհիվ էլ թիմերի միջև միավորների տարբերությունը հասավ մեկի: Ինչպես, օրինակ, եղավ մեզ մոտ. երեք տուր առաջ 9 միավոր ավել ունեինք մոտակա մրցակցից, բայց երկու խաղ պարտվեցինք ու ամեն ինչ վճռվեց վերջին տուրում:
Զիդանը մեծագույն խաղացող է եղել, բայց որպես մարզիչ դեռ չի կայացել: Ու ես չէի ասի, որ «Ռեալը» հիմա ֆանտաստիկ ֆուտբոլ է խաղում: Պարզապես Զիդանը հեղինակություն է, ինչի հաշվին էլ թիմը սկսեց ավելի կազմակերպված խաղալ: Անգամ եթե «Ռեալը» հաղթի Չեմպիոնների լիգայում, մենք դեռ Զիդանի աշխատանքը չենք տեսնի, դա կերևա մեկ տարի հետո:
Ֆուտբոլում միշտ թիմերի շանսերը գնահատում եմ 50/50, ֆուտբոլն անկանխատեսելի է, ոչ ոք չի կարող կարծել կամ եզրակացություն անել: Երբեք կանխատեսումների, խաղադրույքների հետ առնչություն չեմ ունեցել:
Բնականաբար, հարձակման գծում ունեցած վարպետների շնորհիվ «Ռեալը» կարող է առավելություն ունենալ, մյուս կողմից էլ՝ «Աթլետիկոն» մարտավարությամբ է ունակ հաղթել մրցակցին: Եզրափակչի խաղերը հիմնականում գեղեցիկ չեն լինում, ավելի շատ լարվածություն, արդյունքի հասնելու համար մինչև վերջին շունչը պայքար: Ես այս տարիների ընթացքում մեկ-երկու գեղեցիկ եզրափակիչ կարող եմ հիշել: Բայց այս խաղում մի փոքր նախապատվություն տալիս եմ «Ռեալին»:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: