«Օսկար 2016»-ի կանխատեսում. Դիանա Մարտիրոսյան (կինոքննադատ). ԴիԿապրիոն կստանա բաղձալի արձանիկը, «Փրկվածը»՝ ոչ
Լավագույն ֆիլմ
Կանխատեսում՝ «Իջեցման խաղ»/The Big Short
Այս անվանակարգում հաղթողը «Փրկվածը» չի լինի, քանի որ Ինյարիտուն նախորդ տարի «Բըրդմենի» համար «Օսկար» նվաճել էր, եւ շատ քիչ դեպքեր են եղել մրցանակաբաշխության մեջ, որ ինչ-որ մեկը երկու տարի անընդմեջ վեր պարզի պատվավոր մրցանակը (Հենքսը եւ էլի մի քանիսը): Եվ եթե ոչ «Փրկվածը», ապա «Իջեցման խաղը», որովհետեւ Ամերիկան սիրում է մեծ ֆիլմեր, մեծ իրադարձությունների մասին: Կինոնկարը 2008 թվականին ամերիկյան տնտեսական ճգնաժամի մասին է, այսպես ասած բիզնես-ֆիլմ է, եւ եթե այս ֆիլմում չխաղային Բրեդ Փիթը, Քրիստիան Բեյլը, Ռայան Գոսլինգը, ապա այն մեծ հաջողություն չէր ունենա: Ճիշտ է, պատմությունը հետաքրքիր է, բայց հանդիսատեսի լայն շրջանակի համար չէ, օրինակ՝ 18 տարեկան աղջկան դժվար թե հետաքրքիր լինի միջնորդների, ճգնաժամի մասին ֆիլմը, այդ պատճառով էլ ավելի շատ ուշադրություն գրավելու համար ռեժիսորը հրավիրում է հանրահայտ դերասանների: Ինձ թվում է ՝ լավագույն ֆիլմը կլինի հենց «Իջեցման խաղը», քանի որ «Փրկվածն» ավելի շատ օպերատորական աշխատանք է, եւ դրա համար կարող է մրցանակ ստանալ Լյուբեցկին (ֆիլմի օպերատորը), բայց օսկարյան մտածելակերպով տրամաբանական կլինի հենց Փիթի եւ Բեյլի մասնակցությամբ կինոնկարի հաղթանակը:
Լավագույն ռեժիսոր
Կանխատեսում՝ Ադամ Մըքքեյ («Իջեցման խաղ») կամ Թոմ ՄաքՔարթի («Ուշադրության կենտրոնում»/Spotlight)
Բացառում եմ Ինյարիտուին վերոնշյալ պատճառով: Բացառում եմ նաեւ Ջորջ Միլերին («Խելագար Մաքսը. զայրույթի ճանապարհը»/Mad Max: Fury Road), քանի որ ֆիլմն ավելի շատ զվարճանալու համար էր: «Սենյակ»-ի համար Աբրահամսոնը դժվար թե «Օսկար» ստանա, քանի որ սա այն ֆիլմը չէ, որն իռլանդացի անհայտ ռեժիսորին նման մակարդակի մրցանակ կպարգեւի: Կհաղթի ամերիկացիներից մեկը՝ կամ Թոմ ՄաքՔարթին, կամ Ադամ Մըքքեյը: Երկուսն էլ հավասար շանսեր ունեն, այս հարցում որեւէ մեկին առավելություն տալ չեմ կարողանում:
Լավագույն դերասան
Կանխատեսում՝ Լեոնարդո ԴիԿապրիո («Փրկվածը»/The Revenant)
Հիմնականում «Ոսկե գլոբուս», եւ հատկապես Գիլդիայի մրցանակը ստանալու դեպքում դերասանը նվաճում է նաեւ «Օսկարը», քանի որ երկուսն էլ նույն համակարգով են ընտրվում: Լեոյի գլխավոր մրցակիցը Էդդի Ռեյդմենն է «Դանիացի աղջիկը» ֆիլմից: Բայց նրա հաղթանակն էլ է քիչ հավանական, քանի որ երկու տարի անընդմեջ «Օսկար» նվաճել եզակիներին է հաջողվել, ինչպես օրինակ Թոմ Հենքսն է: Եվ վերջապես եկել է ժամանակն արդեն Լեոնարդոյին մրցանակ տալու: Լինում է նաեւ այդպես, որ հաղթում են ոչ թե կոնկրետ ֆիլմի, այլ առհասարակ ունեցած նվաճումների համար: Լավագույն դերասան կլինի ԴիԿապրիոն ոչ թե միայն այս կինոնկարի համար, այլեւ, քանի որ ժամանակն է եկել:
Լավագույն դերասանուհի
Կանխատեսում՝ Բրի Լարսոն («Սենյակը»/Room)
Շատ դերասանուհիներ կան, որ մեծ ֆիլմով հայտնում են իրենց մասին աշխարհին: Եվ մի քանի օր առաջ, երբ Բրի Լարսոնը ստացավ Գիլդիայի մրցանակը, դա ակնարկ էր, որ նա նաեւ կնվաճի պատվավոր արձանիկը: Այս անվանակարգում նա բացարձակ ֆավորիտ է:
Երկրորդ պլանի լավագույն դերասան
Կանխատեսում՝ Թոմ Հարդի («Փրկվածը»/The Revenant)
Տղամարդկանցից երեւի թե Թոմ Հարդին: Նա հիմա շատ ակտիվ նկարահանվում է մի քանի ֆիլմերում, եւ եթե տարիներ առաջ նա հասարակ բրիտանացի դերասան էր, հիմա բավական կոմերցիոն է, եւ այսպես ասած՝ իր դիրքերը կամրապնդի «Փրկվածում» դերի համար «Օսկար» նվաճելով: Ստալոնեին բացառում եմ, քանի որ այն, ինչը նա ցույց տվեց, մենք արդեն տեսել էինք, ոչ մի նորություն չկար, իսկ «Օսկարը» սիրում է նորամուծություններ, երբ դերասանը արտաքինն է փոփոխում դերի համար, ինչ-որ էքստրեմալ պայմաններում է լինում: Իսկ Ստալոնեն սիրված է, բայց նա «լայն շրջանակներ» չունի:
Երկրորդ պլանի լավագույն դերասանուհի
Կանխատեսում՝ Ջենիֆեր Ջեյսոն Լի («Անտանելի ութնյակը»/The Hateful Eight)
Տարանտինոյին գրեթե միշտ զրկում են մրցանակներից, դրա փոխարեն նրա դերասաններն են հաղթում: Այստեղ առաջնորդվելով նաեւ բացառության սկզբունքով՝ կարծում եմ, որ կհաղթի Ջենիֆեր Ջեյսոն Լին:
Լավագույն անիմացիոն ֆիլմ
Կանխատեսում՝ «Գլուխկոտրուկ»/Inside out
Կարծում եմ, լավագույն անիմացիոն ֆիլմ կճանաչվի Inside out-ը, քանի որ այս տարվա նոմինանտներից ամենահաջողվածն է: Կարելի է ասել, որ մրցակցությունից դուրս է:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: