«Մաքաբի» – «Ալաշկերտ». Էդուարդ Քալանթարյանի կանխատեսումը
Բարև բոլորին.
Մենք արդեն սովորել ենք, որ տարվա այս հատվածում հայկական թիմերից միջազգային ասպարեզում հանդես են գալիս միայն հավաքականները: ՈւԵՖԱ-ի հերթական նորամուծության շնորհիվ 2021 թվականի աշունը մեզ համար ֆուտբոլային այլ երանգներ ստացավ: Հայկական ակումբը, մասնավորապես «Ալաշկերտը», հանդես կգա եվրագավաթի խմբային փուլում: Այո, դա նշանակությամբ միայն երրորդ եվրագավաթն է, բայց միևնույնն է, մենք առնվազն մինչև տարվա վերջ կմրցենք արտասահմանյան ակումբների հետ:
Այն, որ Կոնֆերենցիաների լիգան պարզապես ժամանցի վայր չէ, հաստատում է Հայաստանի չեմպիոնի խումբը: Ավստրիական ԼԱՍԿ-ը, իսրայելական «Մաքաբին» և ֆիննական ՀԻԿ-ն բավականին բարդ մրցակիցներ են: Պատմական մրցաշարն «Ալաշկերտը» կսկսի Թել-Ավիվում: «Մաքաբին» Իսրայելի նախորդ առաջնությունում գրավեց երկրորդ տեղը և պայքարը սկսեց Կոնֆերենցիաների լիգայի խաղարկության որակավորման երկրորդ փուլից: Հետաքրքիր է, որ թելավիվցիները բոլոր դիմակայությունների առաջին հանդիպումներն անցկացրին դրսում: Առաջին երկու դիմակայություններում «Մաքաբին» մրցակցի դաշտում բավարարվեց գոլազուրկ ոչ ոքիներով, իսկ հաջորդ փուլ դուրս գալու հարցը լուծեց տանը: Փլեյ-օֆֆ փուլում էլ նրանք ղազախական «Շախտյորին» տանը հաղթեցին, այն տարբերությամբ, որ մինչև այդ հաղթանակ էին բերել նաև մրցակցի դաշտից: Սա խոսում է այն մասին, որ «Մաքաբին» «տնային» թիմ է: Էլ չասեմ, թե որքան է նրա դեմ խաղալը բարդանում, երբ լեցուն է շուրջ 30 հազարանոց «Բլումֆիլդ» ստադիոնը:
«Ալաշկերտը» Հայաստանի Պրեմիեր լիգայում այս պահին լուրջ խնդիրներ ունի: Անցկացրած չորս խաղում Ալեքսանդր Գրիգորյանի գլխավորած թիմը միայն մեկ միավոր է վաստակել և մրցաշարային աղյուսակում նախավերջինն է: Ակնառտու է, որ Հայաստանի չեմպիոնը դեռ պատրաստ չէ հավասար պայքար մղել երկու ճակատով: Գումարած՝ թիմի մի քանի խաղացողներ թարմ չեն հավաքականի հանդիպումներից հետո: Ենթադրվում է, որ երևանյան ակումբը մի կողմ կդնի բոլոր խնդիրները և 100 տոկոսով կնվիրվի խմբային փուլի առաջին խաղին, բայց վառելիքի պակասը միայն նվիրվածությամբ չես լրացնի: «Մաքաբին» այս խաղում բացահայտ ֆավորիտ է և դժվար է պատկերացնել, թե ինչի շնորհիվ Գրիգորյանն ու նրա թիմը կարող են գոնե միավոր բերել Իսրայելից:
Հետևաբար, ընտրում եմ «Մաքաբիի» հաղթանակը՝ պայմանով, որ խաղում կգրանցվի առնվազն երեք գոլ:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: