«Մանչեսթեր Յունայթեդ» — «Մանչեսթեր Սիթի». Ռոբերտ Գասպարյանի կանխատեսումը

Ֆուտբոլի Անգլիայի առաջնության 29-րդ տուրի կենտրոնական հանդիպումը կկայանա «Օլդ Թրաֆորդ» ստադիոնում, որտեղ մանկունյական դերբիի շրջանակներում իրար հետ կմրցեն «Մանչեսթեր Յունայթեդն» ու «Մանչեսթեր Սիթին»։ Սա այս թիմերի արդեն 4-րդ առճակատումն է այս մրցաշրջանում։ Ընդ որում՝ նախորդ բոլոր դեպքերում հանդիպումները շահել է բացառապես հյուրընկալվող թիմը։

«Մանչեսթեր Յունայթեդը» այս մրցաշրջանում հանդես է գալիս փոփոխական հաջողություններով։ ԱՊԼ-ի կաճատև դադարը լուրջ օգնեց Սուլշերի թիմին։ Նախ «կարմիր» սատանաները ապահովեցին իրենց տեղը Եվրոպա լիգայի և Անգլիայի գավաթի խաղարկության հաջորդ փուլում, իսկ ներքին առաջնությունում թիմն անպարտելի է տևական ժամանակ։ Վնասվածքի պատճառով Սուլշերին չեն կարողանա օգնել Պոգբան ու Ռեշֆորդը, իսկ Հարի Մագուայրը ապաքինվել է վնասվածքից ու նման մրցակցի հետ դիմակայությունում նա պետք է դուրս գա առաջին րոպեներից։

Պեպ Գվարդիոլայի գլխավորած «Սիթին» այլևս չի փայլում գոլային հրավառություններ կազմակերպելով։ «Քաղաքաբնակները» վերջին 5 խաղերից 4-ում մրցակիցների նկատմամբ առավելության է հասել ընդամենը 1 գնդակի տարբերությամբ։ Սակայն սկզբունքային մրցակցի հետ խաղում Պեպմն ունենալու է կադրային խնդիր, որովհետև դարձյալ վնասվածք է ստացել ու անորոշ ժամանակով շարքից դուրս է եկել պաշտպան Այմերիկ Լապորտը։ Ու անգամ Ջոն Սթոնզի ու Նիկոլաս Օտամենդիի առկայությունը չի ապահովում վստահ խաղ պաշտպանության կենտրոնում։