«Լիվերպուլ» — «Էվերթոն». Արթուր Պետրոսյանի կանխատեսումը

Ափսոս, որ այսպիսի խաղը տեղի է ունենում երկշաբաթյա ընդմիջումից հետո հենց առաջին տուրում, որը, որպես կանոն, խախտում է թիմերի խաղային ռիթմերը և բացասաբար անդրադառնում սկզբնական ժամանակում խաղացողների համագործակցության վրա: Այստեղ նաև խաղի շուտ սկիզբն է՝ կեսօրին սկսվող հանդիպումները չափազանց հազվադեպ են շատ դիտարժան ստացվում:

«Լիվերպուլի» մոտ վերջին ժամանակներս վատ նորությունները շատ են, իսկ լավերն ընդհանրապես չկան: Հավաքականում գտնվելու ժամանակ վնասվածք է ստացել և մեկ ամիս դուրս մնացել, երևի թե, վերջին ամսվա թիմի լավագույն խաղացող Ադամ Լալլանան: Ձգձգվում է Ջորդան Հենդերսոնի վերականգնումը: Ֆիլիպե Կոուտինյոն և Ռոբերտո Ֆիրմինոն երկար ուղևորություններ ու ոչ հեշտ հանդիպումներ են ունեցել Բրազիլիայի հավաքականում՝ երկուսի մասնակցությունն էլ դերբիում հարցականի տակ է: Նույն խնդիրը սենեգալցի Սադիո Մանեի մոտն է, բայց աֆրիկացին պետք է խաղա: Սիմոն Մինյոլեն դժվար թե հոգեբանական հիանալի վիճակում է Ռուսաստանից երեք գնդակ բաց թողնելուց հետո՝ հատկապես նկատի ունենալով այն, որ վերջինը եղավ արդեն մրցավարի ավելացրած ժամանակում, անցավ նրա ոտքերի արանքով և զրկեց Բելգիային հաղթանակից:

Բացի այդ, այստեղ կա նաև Մյոնխենգլադբախի «Բորուսիայից» Մահմուդ Դահուդի չհաջողված տրանսֆերը, ով նախընտրեց Դորտմունդը, Էմրե Չանի պայմանագիրը երկարաձգելուց հրաժարվելը և ԱՊԼ-ի կողմից հնարավոր սանկցիաները «Սթոքի» 12-ամյա խաղացողին ձեռք բերելու «Լիվերպուլի» փորձերի համար: Ընդհանուր առմամբ, մարտը Յուրգեն Կլոպի համար ավարտվում է ոչ լավագույն կերպով:

«Էվերթոնի» մոտ խնդիրներն ընդամենը երկուսն են՝ մինչև մրցաշրջանի ավարտ դուրս են մնացել Շեյմուս Կոուլմենը և Ռամիրո Ֆունես Մորին, ովքեր լուրջ վնասվածքներ են ստացել իրենց հավաքականներում:

«Կապույտները» լավ մարզավիճակում են: Հունվարի 7-ից նրանք ընդամենը մեկ պարտություն ունեն, իսկ վերջին չորս տուրերում երեք հաղթանակ են տարել, ընդ որում դրանցում խփել են 11 գնդակ:

Ապրիլի սկզբում չորս օրերի ընթացքում «Էվերթոնը» երկու կարևոր հանդիպում ունի՝ «Էնֆիլդում» և «Օլդ Թրաֆֆորդում», որոնցում հաղթանակների դեպքում Ռոնալդ Կումանի թիմը լիովին կարող է տեղ գտնել նույնիսկ չեմպիոնլիգյան քառյակում:

Ինձ թվում է, որ «Լիվերպուլին» ժամանակ պետք կգա, որպեսզի գտնի իր խաղը, շոշափի գնդակը, սովորի խաղացողների նոր համակցությանը և հասկանա, թե ինչպես կոտրի հյուրերի պաշտպանությունը: «Էվերթոնը՛», որը հավանաբար չի արագացնի իրադարձությունները, այս առումով ավելի հեշտ կլինի: Հարձակման սուր ծայրում 21 խփած գնդակով ԱՊԼ-ի լավագույն ռմբարկու Ռոմելու Լուկակուի առկայությունը միայն կօգնի երկրորդ համարով խաղի ժամանակ: Ենթադրում եմ, որ հանդիպման հաշիվը կբացեն հենց հյուրերը, իսկ «կարմիրները», միայն հայտնվելով հետապնդողի դերում, վերջապես կարթնանան և կխաղան պահանջվող արագություններով: