«Լեսթեր» — «Մանչեսթեր Յունայթեդ». Ռոբերտ Գասպարյանի կանխատեսումը

Անգլիական մրցաշրջանի մեկնարկին սպասում էին բոլորը: Իհարկե, մեր Հենրիխ Մխիթարյանի առկայությունն այս մրցաշարն ավելի հետաքրքիր է դարձնում մեզ` հայերիս համար: Բայց կան այլ, ոչ պակաս կարևոր գործոններ, որոնք ստիպելու են մեզ ամենայն ուշադրությամբ ու շունչը պահելով հետևել Պրեմյեր Լիգայի բոլոր խաղերի ընթացքին: Նոր մրցաշրջանի մեկնարկը կտրվի երկրի սուպերգավաթի խաղարկմամբ` իրար հետ կմրցեն «Լեսթերն» ու «Մանչեսթեր Յունայթեդը»:

Այս խաղում հաղթելու իրական հնարավորություն ունեն ինչպես չեմպիոնները, այնպես էլ գավաթակիրները: Հակառակ բոլոր տեսակի կանխատեսումներին, «Լեսթերը» կարողացավ պահպանել չեմպիոնական կազմը: Թերևս միայն Ն՛Գոլո Կանտեն լքեց «աղվեսների» ճամբարը: Այդուհանդերձ, «Լեսթերում» մնացին լավագույն ռմբարկու Ջեյմի Վարդին, ով դիմակայեց «Արսենալ» տեղափոխվելու գայթակղությանը, եւ նախորդ մրցաշրջանի իսկական հայտնություն Ռիյադ Մահրեզը:

Բացի այդ, նրանք կարողացան լրջորեն համալրել իրենց կազմը՝ ձեռք բերելով գերմանացի դարպասապահ Ռոն-Ռոբերտ Զիլերին, լեհ Բարտոզ Կապուստկային եւ նիգերիացի հարձակվող Ահմեդ Մուսային:

«Կարմիր սատանաներն» այս տարի առավել շռայլ էին տրանսֆերային շուկայում: Գլխավոր մարզիչ Ժոզե Մոուրինյոյի պահանջով թիմը ձեռք բերեց բազմաթիվ նոր աստղերի: Իր խոսքով «Յունայթեդի» կազմը համալրել են Գերմանիայի ու Ֆրանսիայի առաջնությունների լավագույն ֆուտբոլիստները` «Դորմունդի Բորուսիայի» հարձակվողական ոճի կիսապաշտպան Հենրիխ Մխիթարյանը և «ՊՍԺ»-ի վերջին տարիների լավագույն ռմբարկու, հարձակվող Զլատան Իբրահիմովիչը: Թիմի տրանսֆերային որսը դեռևս չի ավարտվել: Այն լիարժեք դարձնելու համար անհրաժեշտ է ավարտին հասցնել Պոլ Պոգբայի տրանսֆերը, որն արդեն եզրափակիչ փուլ է մտել:

Թեպետ խաղակցվածության հետ «աղվեսները» խնդիր չունեն` թիմի անցած տարվա կորիզը պահպանվել է, այդուհանդերձ, «Լեսթերի» տղաներն իրենց վրա աներևակայելի ճնշում են զգալու: Բացի դրանից, մրցակից թիմի կարգն իր խաղացողներով հանդերձ անհամեմատ ավելի բարձր է: Ուստի առավել քան հանգիստ կարելի է կանխատեսել «Մանչեսթեր Յունայթեդի» հաղթանակը, այն էլ հիմնական ժամանակում: