Իտալական էքսպրեսս. «Յուվենթուսն» ու «Ռոման» մրցաշրջանում իրենց առաջին հաղթանակները կտանեն
«Ռոմա» — «Ուդինեզե»
«Ռոման» ընդունում է «Ուդինեզեին»: Մի թիմի, որը վերջին տարիներին կորցրեց իր ոսկե տարիների երկու գլխավոր հեղինակներին՝ մարզիչ Ֆրանչեսկո Գվիդոլինին և թիմի ավագ ու առաջատար Անտոնիո դի Նատալեին: Դի Նատալեն «Ուդինեզեի» սիմվոլն էր, ակումբի լավագույն ռմբարկուն, ով և՛ գոլեր էր խփում և՛ փոխանցումներ կատարում, առանց որի դժվար է պատկերացնել թիմին: Վերջպապես, ում վարպետության և խելացի խաղի շնորհիվ՝ թիմն անընդհատ միավորներ էր «փախցնում»: Եվ առանց Դի Նատալեի՝ «Ուդինեզեն» Իտալիայի գավաթի հենց առաջին խաղում դուրս մնաց մրցաշարից: Այն արդեն առաջնությունում իր գոյությունը պահող թիմ է դարձել: «Ռոման», նախկինի պես, կորցրել և ձեռք է բերել խաղացողների: Հիմնական կորուստն, իհարկե, Միրալեմ Պյանիչն է: Հռոմից ակումբը չորեքշաբթի օրը Չեմպիոնների լիգայի որակավորման փլեյ-օֆֆ փուլում հյուրընկալվելիս ոչ-ոքի խաղաց «Պորտուի» հետ, և հաջորդ շաբաթ կկայանա պատասխան հանդիպումը: Այդ պատճառով կարծում եմ, որ Սպալետտին համեմատաբար թույլ կազմ կմտցնի «Ուդինեզեի» դեմ՝ խնայելու համար ուժերը: Սակայն նույնիսկ երկրորդ կազմով «Ռոման» կհաղթի ոչնչի չձգտող և երբեմնի անվանի «Ուդինեզեին»: «Ռոմայի» հաղթանակ:
«Յուվենթուս» — «Ֆիորենտինա»
Դժվար է մրցաշրջանի մեկնարկային խաղերը կանխատեսելը, երբ թիմերը միայն ընկերական հանդիպումներ են անցկացրել և դրանցով հնարավոր չէ ենթադրություններ անել՝ մարզավիճակի և փոփոխությունների մասին: «Յուվենթուս». Իտալիայի վերջին հինգ տարիների չեմպիոնն այս տարի ևս մրցաշարի ակնհայտ ֆավորիտն է: Թիմը ռեկորդային գումարով վաճառեց Պոլ Պոգբային, բայց նաև մեծ գնով ձեռք է բերել հիանալի ֆուտբոլիստների՝ ի դեմս Գոնսալո Իգուայինի և Միրալեմ Պյանիչի: Մարզիչը նույնն է, թիմի հիմնական կազմն ու նպատակները ևս, այդ առումով «Յուվենթուսում» մեծ փոփոխություններ չեն եղել: Թուրինյան ակումբի կազմն Իտալիայի ամենաուժեղ և աշխարհում լավագույններից մեկն է: «Ֆիորենտինայից» հեռացել են Յակուբ Բլաշչիկովսկին և Մարիո Գոմեսը՝ երկուսն էլ «Վոլֆսբուրգ»: Սակայն Ֆլորենցիայից ակումբը վարձակալել է «Բարսելոնայի» կիսապաշտպան Քրիստիան Տեյլոյին, նաև թիմ է վերադարձել անընդհատ վնասվածքներ ունեցող գոլահար Ջիուզեպպե Ռոսսին, ում «Ֆիորենտինան» ցանկանում է պահել կազմում: Պաուլու Սոուզայի թիմը Ա Սերիայի նախորդ մրցաշրջանում զբաղեցրել է 5-րդ հորիզոնականը և կխաղա Եվրոպայի լիգայի խմբային փուլում: Ընդհանրապես, առաջնության առաջին տուրերը աչքի չեն ընկնում արդյունավետությամբ և մարզիչները նախընտրում են զգուշավոր ֆուտբոլ խաղալ: Այդուհանդերձ, «Յուվենթուսը» տանը, թեկուզ և իր սիրած նվազագույն հաշվով, բայց կհաղթի լուրջ ձեռքբերումներ չունեցող «Ֆիորենտինային»: Թուրինյան ակումբն ունի համաշխարհային կարգի աստղեր և չնայած մարզավիճակի բացակայությանը՝ նրանց կարգն ու վարպետությունը կապահովի մրցաշրջանում «Յուվենթուսի» առաջին հաղթանակը:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: