Եվրատեսիլի կանխատեսում. Արամ MP3. Իվետա Մուկուչյանը կլինի լավագույն հնգյակում
— Երկու տարի առաջ Եվրատեսիլում Հայաստանը Դուք ներկայացրիք: Սեփական փորձից ելնելով կարո՞ղ եք ասել՝ որն է հաջողության հասնելու գաղտնիքը:
— Փողը (ծիծաղում է — խմբ.) … Չէ, իրականում կարեւորը լավ ելույթ ունենալն է, իսկ որպես արդյունք՝ մեր ռեկորդը գերազանցելը:
— Այս տարի մեր երկիրը ներկայացնելու է Իվետա Մուկուչյանը՝ “LoveWave” երգով: Ի՞նչ կասեք երգի մասին:
— Երգն օրիգինալ է: Ինձ այդքանով դուր է եկել: Նման չէ մնացածներին, տարբերվող է, իսկ այս մրցույթում նախապատվությունը հենց նման երգերին է տրվում: Երգը կոմերցիոն տարրեր նույնպես ունի, Իվետան էլ շատ լավ է երգում: Հետեւել եմ բուքմեյքերների եւ լրագրողների կարծիքներին. շատերն են հավանել Իվետայի երգը: Ճիշտ է՝ նրանց տեսակետի վրա հիմնվելն այնքան էլ ճիշտ չէ, բայց դա հույս է տալիս, որ գոնե տասնյակում կլինենք:
— Մեր մրցակիցների երգերը լսե՞լ եք: Ի՞նչ կարծիք ունեք: Ֆավորիտը Ռուսաստանը ներկայացնող Սերգեյ Լազարեւն է:
— Անկեղծ ասած՝ ինձ ընդհանրապես դուր չի եկել Ռուսաստանի երգը: Այդ երգից ավելի շատ ռուսական փոփ երաժշտության «հոտ էր գալիս»: Հավանել եմ Ավստրալիայի երգը, չնայած չգիտեմ՝ որքանով է հավանական Եվրատեսիլում այդ երկրի հաղթանակը: Շատ հաճախ բուքմեյքերների գնահատականները սխալ են դուրս գալիս, ինչի շնորհիվ բազմաթիվ ընկերություններ մեծ գումար են աշխատում:
— Օրինակ՝ Կոնչիտայի հաղթանակի համար սահմանված էր 34.0 գործակիցը …
— Իմ գործակիցն էլ բավական բարձր էր: Այնպես որ, դա այնքան էլ 100%-անոց չէ: Գուցե հիմա Լազարեւի շանսերը շատ բարձր են գնահատվում, բայց իրականում նա չհայտնվի անգամ լավագույն տասնյակում:
— Անցնենք կանխատեսումներին: Սկսենք առաջին կիսաեզրափակչից: Մեզ հետ նույն խմբում, որպես ֆավորիտ, Ռուսաստանը եւ Մալթան են: Իվետա Մուկուչյանը ի՞նչ դիրք կզբաղեցնի այդ փուլում:
— Անցնելու մասին խոսք չկա, միանշանակ եզրափակիչ կանցնի, բայց թե ո՞ր տեղը կզբաղեցնի՝ դժվար է ասել: Վերջին տարիներին կատարված փոփոխությունների շնորհիվ ամեն ինչ կարող է շատ արագ փոփոխվել: Հիմա հեռուստադիտողներից շատ բան կախված չէ, իսկ ժյուրիի ձայնը կարող է վճռորոշ դառնալ: Կարծում եմ՝ Իվետան կկարողանա հայտնվել լավագույն եռյակում:
— Տեղափոխվենք եզրափակիչ: Մեր գործակիցն այնտեղ բավական ցածր է: Ի՞նչ արդյունք եք ակնկալում:
— Դժվար է կանխատեսում անել, քանի որ անկեղծ ասած, բոլոր երգերը չեմ լսել: Ամեն դեպքում կարծում եմ, որ լավագույն հնգյակում կլինենք: Հաշվի առնելով Եվրոպայից լսած արձագանքները: Երգը նոր է, օրիգինալ, այլ, նման չէ ուրիշներին, հետաքրքիր ձեւ է օգտագործված հայկական զուռնան, Իվետան նույնպես շատ օրիգինալ, արտիստիկ է:
— Եվ վերջապես, ո՞վ կհաղթի Եվրատեսիլ 2016-ում:
— Անկեղծ եմ ասում՝ այս մրցույթը շատ անկանխատեսելի է: Գործակիցները կարող են խաբուսիկ լինել, մի քանի ժամվա ընթացքում կարող են շատ արագ փոխվել: Իսկ ո՞վ կգրավի առաջին տեղը՝ գրեթե անհնար է գուշակել: Իհարկե, շատ եմ ցանկանում, որ մենք հաղթենք: Բայց ռեալ դատելով՝ եթե գերազանցենք մեր սահմանած ռեկորդը, լինենք լավագույն եռյակում, դա մեզ համար նույնպես հաղթանակ կլինի:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: