«Դյուդելանժ» – «Փյունիկ»: Էդուարդ Քալանթարյանի կանխատեսումը
Ողջույն.
Հայկական ակումբներից երկուսը շարունակում են իրենց եվրոպական շրջագայությունը: «Փյունիկը» ռումինական «Կլուժին» շրջանցելուց հետո որակավորման երկրորդ փուլում մրցում է Լյուքսեմբուրգի չեմպիոն «Դյուդելանժի» հետ: Երևանում կայացած առաջին խաղում մեր չեմպիոնը պարտվեց 0։1 հաշվով:
Այդ պարտության շատ պատճառներ կան: Զուտ խաղայինները թողնենք մի կողմ, առանձնացնեմ ինձ համար գլխավորը՝ «Փյունիկին» պակասեց Եղիշե Մելիքյանի ներկայությունը պահեստայինների նստարանին: Դա հենց այն խաղն էր, որտեղ Մելիքյանն իր եռանդով ու չափազանց պահանջկոտությամբ պետք է առաջ մղեր իր թիմին: «Փյունիկը» բավականաչափ պահեր չստեղծեց գոլ խփելու համար: Այդպիսի իրավիճակում կարող էր լավ արդյունք համարվել չպարտվելը, բայց դա էլ քիչ հավանական էր և ահա թե ինչու. «Դյուդելանժը» շատ հանգիստ փոխում էր խաղի ռիթմը: Կառուցելով ամուր ու գրագետ պաշտպանություն՝ մեր մրցակիցը կարողանում էր կարճ ու ճշգրիտ փոխանցումներով դուրս գալ գրոհի: Եվ ամենակարևորը՝ երբ զգացվում էր դրա կարիքը, «Դյուդելանժը» հասնում էր «Փյունիկի» տուգանային հրապարակ ու գրեթե ամեն անգամ գոլային պահ էր ստեղծում: Դա ամենամտահոգիչն է, որովհետև այս դիմակայության ինտրիգը կարող էր վերանալ դեռ «Հանրապետականում»:
Վստահ եմ՝ խաղը դիտած գրեթե բոլոր ֆուտբոլասերները կրկին հիշեցին Ուգու Ֆիրմինուին և Սերժ Դեբլեին: Մենք նորից համոզվեցինք, որ կայուն գոլ խփող հարձակվող «Փյունիկն» այսօր չունի: Չմոռանանք, որ «Կլուժի» հետ դիմակայության երկու գոլն էլ խփեց կենտրոնական պաշտպան Զորան Գայիչը: Այսպես Չեմպիոնների լիգայում երկար առաջ չես գնա, և Հայաստանի բազմակի չեմպիոնի ղեկավարությունն ու մարզչական անձնակազմը դա պետք է հաշվի առնեին:
Լյուքսեմբուրգում «Փյունիկը» հույս ունի կրկնել առաջին փուլի սխրանքը՝ իրենը ստանալով անմնացորդ նվիրվելով ու մինչև վերջին րոպեն պայքարելով: Բայց տարբերությունն այն է, որ «Դյուդելանժն» ունի չբացած ներուժ և, բնականաբար, հաշվի կառնի «Կլուժի» թերացումները: Խելացին սովորում է իր, իմաստունը՝ ուրիշի սխալների վրա:
Սեփական դաշտում «Դյուդելանժը» կփորձի հնարավորինս շուտ ապահովագրել ընդհանուր հաջողությունը՝ շեշտը դնելով արագ գոլի վրա: Բայց, անգամ եթե դա չստացվի, մտածելու առիթ ունի միայն «Փյունիկը», որը ստիպված է գոլ խփել: Ուշ, թե շուտ, մեր չեմպիոնը մրցակցին կտա նաև ազատ հակագրոհելու առիթներ: Այս պարագայում շատ հավանական է թվում «Դյուդելանժի» ուղիղ հաղթանակը: Ինչպես ասում են, տհաճ է, բայց փաստ:
Շնորհակալ ենք Ձեր օգնության համար:
Այս հեղինակի նոր հրապարակումների մասին ծանուցումները կգան «ԲՌ»-ում գրանցվելիս ձեր կողմից նշված էլ.հասցեին:
Այս փորձագետի նոր կանխատեսումների մասին ծանուցումներ կստանաք մեր կողմից՝ էլ.հասցեի միջոցով:
Դա նշանակում է, որ դուք այլեւս այս հեղինակի նյութերի վերաբերյալ ծանուցումներ չեք ստանա:
Դա նշանակում է, որ այլեւս նրա վերաբերյալ ծանուցումներ չեք ստանա էլ.հասցեի միջոցով: