Ֆուտբոլային լրագրող և «Բուքմեյքերների ռեյտինգի» փորձագետ Արթուր Պետրոսյանը կանխատեսում է արել «Չելսի» – «Մանչեսթեր Յունայթեդ» Անգլիայի Պրեմիեր լիգայի 13-րդ տուրի հանդիպման վերաբերյալ։
Խոսում ենք Անգլիայի Պրեմիեր լիգայի 13-րդ տուրի կենտրոնական հանդիպման մասին։ «Ստեմֆորդ Բրիջում» «Չելսին» ընդունելու է «Մանչեսթեր Յունայթեդին»։
Լոնդոնցիները հերթական անգամ ապացուցեցին, որ Անգլիայից բացի, ուժեղագույնն են նաև Եվրոպայում։ Կապույտները ոչ մի խնդիր չունեցան «Յուվենտուսի» հետ դիմակայությունում։ Գործնականում անում էին այն, ինչ ցանկանում էին։
Ենթադրում եմ, որ նույն սցենարը կտեսնենք նաև «Յունայթեդի» հետ մրցավեճում։ «Չելսին» ամբողջությամբ կվերահսկի խաղը։
Ինչ վերաբերում է «Մանկունյացիներին», ապա նրանք հաղթեցին իսպանական «Վիլյառեալին», բայց ահավոր անցկացրին առաջին խաղակեսը։ Իսպանացիները տիրում էին նախաձեռնությանը, սակայն ֆիզիկապես չձգեցին, թուլացրին տեմպն ու նաև չիրացրին ստեղծած պահերը։
Եթե նայենք «Յունայթեդի» խաղը Սուլշերի օրոք և առանց նրա, ապա առաջիկայում դժվար թե ինչ-որ բան փոխվի։ Թիմը կրկին փորձելու է օգտագործել Ռոնալդուի գործոնն ու շեշտը դնել արագ հակագրոհների վրա։
Այս պահի դրությամբ «Չելսին» և «Մանչեսթեր Յունայթեդը» տարբերվում են կարգերով։ Այդ պատճառով էլ այս դիմակայության ֆավորիտը հենց լոնդոնցիներն են։
Այնպես որ, առանց կասկածելու ընտրում եմ «Չելսիի» հաղթանակը։