«Ոսկե գնդակ». Բուքմեյքերները կարծում են, որ Մեսին 7-րդ անգամ կարժանանա մրցանակին

Ֆրանսիական ՊՍԺ-ի նորեկ Լիոնել Մեսին այս ամռանն առաջին տիտղոսը նվաճեց Արգենտինայի ազգային հավաքականի կազմում՝ դառնալով Ամերիկայի գավաթի խաղարկության հաղթող: Բուքմեյքերները կարծում են, որ կատալոնական «Բարսելոնայի» կազմում «Ոսկե գնդակի» 6-ակի դափնեկիր դարձած 34-ամյա ֆուտբոլիստը 2021 թվականի արդյունքում 7-րդ անգամ կարժանանա պատվավոր մրցանակին:

Paddy Power բուքմեյքերական գրասենյակի մասնագետները խաղադրույքներ են սահմանել «Ոսկե գնդակ-2021» մրցույթի հաղթողների վերաբերյալ: Լիոնել Մեսիի հաղթանակը գնահատվում է 1.36 գործակցով: Արգենտինացի հարձակվողի հաղթելու հավանականությունը կազմում է 73.5 տոկոս:

Երկրորդ տեղում է Մյունխենի «Բավարիայի» և Լեհաստանի հավաքականի հարձակվող Ռոբերտ Լևանդովսկին: 32-ամյա ռմբարկուն արտակարգ խաղ ցուցադրեց 2019/2020թթ. մրցաշրջանում, սակայն չարժանացավ «Ոսկե գնդակին», քանի որ մրցանակի հանձնման արարողությունը չեղարկվեց կորոնավիրուսի համավարակի պատճառով: Լևանդովսկու՝ այս տարի «Ոսկե գնդակին» արժանանալու գործակիցը 7.00 է:

Երրորդ տեղում է Լոնդոնի «Չելսիի» հետ Չեմպիոնների լիգայի հաղթողի կոչումը նվաճած ֆրանսիացի կիսապաշտպան Նգոլո Կանտեն (8.00 գործակից): 4-5-րդ տեղերը բաժանում են «Չելսիի» իտալացի կիսապաշտպան Ժորժինյոն ու ՊՍԺ-ի ֆրանսիացի հարձակվող Կիլիան Մբապեն (10.00-ական գործակից):

Լավագույն հնգյակին հաջորդում են Անգլիայի չեմպիոն «Մանչեսթեր Սիթիի» բելգիացի կիսապաշտպան Կևին դե Բրույնեն (16.00), Թուրինի «Յուվենտուսի» պորտուգալացի ռմբարկու Կրիշտիանու Ռոնալդուն (16.00) ու Լոնդոնի «Տոտենհեմի» անգլիացի հարձակվող Հարի Քեյնը (20.00):

Բուքմեյքերները խաղադրույքներ են սահմանել Մեսիի՝ ՊՍԺ-ում ելույթների վերաբերյալ

Մեսիի հետ ՊՍԺ-ն դարձել է Չեմպիոնների լիգայի գլխավոր ֆավորիտը