Հայկական բուքմեյքերները բողոքի ակցիա են անցկացրել ընդդեմ նոր հարկային օրենսդրության

Օրենսդրությունը նախատեսում է օնլայն-ազարտային խաղերի լիցենզավորման արժեքի հնգակի բարձրացում:

Կազմակերպիչների գնահատմամբ՝ բողոքի ակցիային մասնակցել է մոտ 300 մարդ, հաղորդում է «Кавказский узел»-ը:

Ինչպես հայտարարեց Europefootball ԲԿ-ի իրավական հարցերով տնօրեն Մարլեն Սմբատյանը, կառավարության կողմից հաստատված վճարումների բարձրացումը կբերի բուքմեյքերական ընկերությունների փակմանը, աշխատատեղերի թվի կրճատմանը և շուկայի մենաշնորհացմանը:

«Նախկինում տոտալիզատորի և օնլայն-հարթակի յուրաքանչյուր լիցենզիա բուքմեյքերական ընկերության համար արժենում էր 100 մլն դրամ: Նոր օրենսդրությամբ երկու լիցենզիաների համար պետք է վճարել 1 մլրդ դրամ: Բուքմեյքերական ընկերությունները չեն կարող անցնել այդ նշաձողը՝ բացառությամբ շուկայում ամենախոշոր խաղացողի», — ասել է նա:

Պարոն Սմբատյանը կարծում է, որ ավելի փոքր և միջին ընկերությունները ստիպված կլինեն փակվել, ինչը կբերի գործազուրկների թվի աճին: «Միայն մեր ընկերությունում գործազուրկ կմնա մոտ 1400 մարդ: Եկամուտից կզրկվեն այն սեփականատերերը, որոնց շինությունները մենք վարձակալել ենք»,- ընդգծեց նա, ավելացնելով, որ Europefootball ԲԿ-ն տարեկան 1,5 մլրդ դրամ հարկ է վճարում:

Հայաստանի ԱԺ-ն հոկտեմբերի 4-ին նոր հարկային օրենսդրություն է ընդունել: Համապատասխան օրինագծի ընդունմանը կողմ են քվեարկել 78 պատգամավոր, դեմ՝ 19:

Սեպտեմբերի վերջին Հայաստանի ֆինանսների նախարար Պավել Սաֆարյանը, երկրի ԱԺ-ում ներկայացնելով «Լիցենզավորման մասին» օրենքի փոփոխության նախագիծը երկրորդ եզրափակիչ լսումի ժամանակ, հայտարարեց, որ օնլայն-կազինոյի վերահսկումը կօգնի փողերի լվացման դեմ պայքարում: Օրինագիծը, որը նախատեսում է օնլայն-կազինոյի լիցենզավորումը նույն մակարդակի բարդությամբ, ինչ սովորական կազինոյի, կարող է ուժի մեջ մտնել 2017 թվականի հունիսի 1-ին: